ЦХХХ-ны сайд Н.Учрал, ХЗДХЯ-ны Төрийн нарийн бичгийн дарга П.Сайнзориг болон албаны бусад хүмүүс УБЕГ-т ажиллав

Цахим хөгжил, харилцаа холбооны сайд Н.Учрал, Төрийн нарийн бичгийн дарга Ч.Золбаяр, Цахим хөгжлийн бодлогын хэрэгжилтийг зохицуулах газрын дарга Б.Билэгдэмбэрэл, Цахим засаглалын хэлтсийн дарга Б.Золбоо, “Дата төв” улсын төсөвт үйлдвэрийн газрын  захирал Б.Баттулга, “И-Монгол академи” УТҮГ-ын захирал Л.Энхбат нар өнөөдөр /2022.10.20/ УБЕГ-ын дарга Д.Дэлгэрсайхан болон бусад газар, хэлтсийн дарга, холбогдох хүмүүстэй уулзалт хийж, УБЕГ-ын үйл ажиллагаатай танилцлаа. Уулзалтын эхэнд УБЕГ-ын дарга Д.Дэлгэрсайхан иргэний цахим үнэмлэхийн үйлдвэр болон энгийн гадаад паспортын үйлдвэрлэл, цахим системийн аюулгүй байдлын хяналт, хамгаалал, Цахим үйлчилгээний төв, Архивын баримт бичгийн хадгалалт хамгаалалтын орчин нөхцөлийг танилцуулж, байгууллагын үйл ажиллагааны талаар дэлгэрэнгүй танилцуулга хийлээ. Түүнчлэн, онцлон хийгдэж байгаа цахим үйлчилгээ, тоон гарын үсэг олголт болон үндэсний энгийн гадаад паспорт олголттой холбоотой хэрэгжүүлж байгаа ажлуудын талаар мэдээлэл өгөв.

ЦХХХ-ны сайд Н.Учрал “ХЗДХЯ бол богино хугацаанд цахимтай холбоотой хуулиудыг их хурлаар өргөн бариад батлуулсан, бүртгэлийн байгууллагын дэд бүтэц ч гэсэн сайжирч, өмнөхөөсөө харьцангуй өөр түвшинд очсон,  2019 оноос хойш ерөнхийдөө их олон дэвшил, ололт амжилт гарсан гэж үзэж байна. Гэхдээ өндөр хөгжилтэй улс орнуудын хэмжээнд хүрэх зорилго тавих хэрэгтэй байна.

Хууль батлах гэдэг нэг асуудал, хуулийг хэрэгжүүлэх нь хамгийн чухал асуудал. Яг одоо энэ цаг үед батлуулсан хуулиудаа хэрэгжүүлэх шатандаа бид нягт хамтран, уялдаа холбоотой ажиллах цаг мөч ирээд байна. Хэрхэн яаж хамтрах вэ гэдэг асуудал чухал. Мэдээж салбар бүр дээр ЦХХХЯ ямар чиглэлээр хэрхэн хамтран ажиллах вэ гэдэг зарчимаа эхлээд тодорхой болгоод хамтын ажиллагаагаа эхлүүлдэг. Үүнтэй адил цаашид энэ хоёр яам хэрхэн хамтран ажиллах, аль ажил дээр эрх үүргээ илүү ойлгож ухамсарлах ёстой вэ, нэгтгэн нийлж хийж хэрэгжүүлж болох вэ гэдгээ тодорхой болгох нь зүйтэй.

Цахим шилжилтээ энгийн иргэнд ч ойлгогдохоор, иргэн бүрт хүргэх алхамуудыг сайтар хийх хэрэгтэй байна. Төрийн байгууллагуудын хоорондын үл ойлголцол, уялдаа холбооноос болоод аль нэг талдаа гацаа үүсгэхгүй байхыг анхаарах хэрэгтэй байна. Бүртгэлийн цахимжилтыг улам боловсронгуй болгох, амьдралд ойрхон болгох тал дээр бид хамтрана. Манай яамны зүгээс ч гэсэн дэмжиж ажиллах болно.” гэв. ХЗДХЯ-ны Төрийн нарийн бичгийн дарга П.Сайнзориг “ХЗДХЯ болон Улсын бүртгэлийн байгууллага нь хамтын ажиллагааг бүхий л талаар дэмжиж ажиллах бүрэн бололцоотой. Хэд хэдэн тодорхой болгох, боловсронгуй болгох, судлах  чухал ажлууд бий... Хууль ёсны шийдвэр гаргахад холбогдох мэдээллийг үнэн зөв гаргаж өгөхөд бэлэн байна. Түүнчлэн тусдаа ажлын хэсэг байгуулан цахимын багц хуульд давж байгаа бүх журмуудыг акц хийж, хүчингүй болгох, дахин харах зэрэг тал дээр хамтран хэрэгжүүлэх ажилд гар бие оролцоно... Ер нь салбар салбарын үйлчилгээг дүгнээд тэдгээр байгууллагуудынхаа хуулийг хэрэгжүүлэх процессыг дахин сайтар хармаар байгаа юм. Цахимжина гэдэг бол товчхоноор процессоо сайжруулах асуудал юм...” гэдгийг онцлов.  Уулзалтын төгсгөлд УБЕГ-ын дарга Д.Дэлгэрсайхан хүрэлцэн ирсэн зочдод талархалаа илэрхийлж, цаашид иргэдэд төрийн үйлчилгээг боловсронгуй, түргэн шуурхай, хүнд сурталгүй хүргэх үүднээс олон талаар ЦХХХЯ-тай уялдаа холбоотой хамтран ажиллахаа илэрхийллээ.